Saturday, July 18, 2009

Pengeraja Iban kelia bepanggai ba pemulih padi


Ulih Anya Kedap

Laban bumai nya pun pengidup, bala Iban siru amat ngintu umai padi enggau beras ke nyadi asi

Sida aki ini, bala tuai dulu suba bela madah, semua pengeraja kitai Iban menya endang sigi ari pemulih padi magang. Nya alai laban umai nya pun pengidup bansa kitai, nya mega kebuah kitai Iban jimat bendar megai adat bumai betaun. Sida mega jimat ngintu padi sereta mega beras tauka asi. Empa penyimat sida, enti asi bisi belimbur kia-kia, asi nya enda tau enda diputik sida enggau naka penyiru, enggau naka penangi.

“Dalam tiap rumah panjai Iban, endang sigi bisi siku orang digaga jadi kepala bumai betaun. Nyadi orang tu enda tau enda orang ke nemu pasal burung, ngelala pejalai bintang enggau bulan, likun pendiau, lalu ruai tikai iya enda tau sekali endur ngempuru laya enggau chakah indu anembiak enggai ka ruai iya kamah laban bekau pengamah enggau penyai. Pia mega orang kena pilih nya sigi enda tau enda orang ke pemulih padi enggau reta, reti nya orang ke pama agi pendiau,” ku Benedict Sandin dalam bup iya Raja Durong.

Nitih adat kenyau ari kelia, kejang deka bumai, kepala taun enda tau enda baum betanya ka utai deka dikereja sida serumah ka taun nya, enti endur bumai udah ditetapka alai ba aum tuai rumah dulu ari nya.

Dia sida lalu betanya ngagai pangan diri sekalika taun ke dulu nya chelap lalu likun ba pengidup padi. Tauka iya bisi asai renga. Enti sema iya renga, tuai nya lalu mai orang ngenselan menua ke dikumbai Buling ka Menua. Tang enti taun ke dulu nya manah sida nadai nyebut tu. Manah tauka jai taun ke dulu, sida selalu gagit deka niri ka Gawai Batu kena bechelap lalu ngemanahka umai taun ke baru.

“Nyadi enti menua digenselan, babi siku mesti dibunuh tambah enggau anak itit siku, pia mega siku tauka dua iku manuk kena miau piring. Orang ke ngereja pengawa enda tau kurang ari tiga ngagai lima iku. Endur sida enselan nya endur lama, enti bisi, lalu enti nadai ulih mungkal endur baru,” ku aya Sandin dalam bup nya.

Ba senentang atur piring, siti piring tumbak, siti engkah atas para, siti engkah atas keresang, empat iti engkah ba sukut para enggau siti buai ka ai. Udah tembu miring nya baru ngaga serepak enggau pentik digaga ari kayu kumpang tauka menuwa dua iti. Tembu nya, baru tuai orang ke ngenselan menua lalu nyampi munyi tu:

“Tu aku miau ka manuk, kena miau piring, miau ading, miau perengka, miau tengkira. Ngambi ka nadai runggang, nadai timpang, bisi semua, bisi sereta. Kebuah alai pengawa kami bakatu, laban kami tu enselan menua, enselan tanah, enselan ai. Laban menua kami taun siti tu kemari udah diasai ka kami bisi menawa, bisi senika, alai kami nanam padi, namam tempuli.

Kami tu minta tulung Petara Aki, Petara Ini, ke menya ke kelia. Kami tu endang nampung endang nerujung, endang niti endang nali ajar Petara, ajar Sempulang Gana, kenyau ari kelia nyentuk ka kemayatu. Kami tu nyau deka bumai baru meh, nya alai nyau ka nuchi, ka meresi, ka ngupas ka ngendas, muai Antu Menawa Antu Senika, muai Antu Kudi, Antu Bebali.”

Udah tembu nyampi nya baru munuh manuk enggau babi. Darah timbun mimit atas mua lubang ke alai darah nya siuh. Darah ke siuh nya lalu ninggang piring enggau tanah dalam lubang. Udah tembu munuh babi, nya baru nganjung semua piring ke disebut nya tadi ngagai endur sida siti-siti. Nyadi darah manuk enggau darah babi, ke ditimbun mimit tadi bai pulai ka rumah.

Datai sida di rumah, nya baru begerah ngasuh orang siku sepintu nganjung batu, duku kena mantap enggau pengait, ngagai langkau panggau ke digaga orang ke tinggal di rumah, tinggal orang ke munuh babi enselan menua dulu tadi.

Udah nya kepala taun ke nyadi tuai gawai miau ka manuk baru kena beranchau tikai. Orang dulu ngembai ka tikai di ruai nya kepala taun empu.

Tembu sida beranchau, dua iku orang belanda ngirit chapan berengkah ari ruai tuai gawai siku ke setak, siku ke setak, mupu ka Antu Rua, niti tempuan. Lebuh mansa mua pintu bilik sida sarumah nya seduai iya lalu bejaku, “Mupu ka Antu Rua aku tu.” Dia orang ke indu lalu meri mayuh macham utai ke enda manah baka gari sepit, gari raga, gari senduk enggau utai bukai. Datai seduai ba pala tangga, seduai lalu ngebuka semua utai dalam chapan kebaruh rumah enggau jaku munyi tu:

“Tu beri kami ngagai nuan Antu Rua, Antu Rangka. Anang agi minta, anang agi nanya. Utai tu bai nuan pulai ke Brunei, ke tasik besai, bai pulai ke Sintang, ke Tawang.”

Udah tembu mupu ka Antu Rua, manuk biau baru kena ngerah ngalu batu. Orang pan lalu nurun siku sapintu, mai pua kumbu kena nyandik tauka ngema batu pulai kerumah.

Ripih sida ke bejalai pulai mai batu nya, siku dulu nyan setunggul burak, lalu ditangkanka orang siku minching manuk. Udah nya dientudika orang siku minching tabak piring, nya baru tuai gawai ke lalu ditangkan orang bukai bejalai betunda udi, dulu ari bala lemambang ke mengap enggau orang ke begendang. Datai di tanah sida lalu bejalai melit langkau panggau nya tiga kali besundang. Indu lalu nabur panggau batu enggau letup. Udah nya baru lelaki miau enggau manuk munyi tu:

“Sa, dua, tiga, empat, lima, enam, tujuh! Aku miau batu enggau manuk, kena aku minta taun ka tu enggau ka agi tu ila mansang jurus, mansang alus, enda senika, enda menawa. Aku minta bulih padi, bulih tempuli. Aku minta kami belimpah minta kami betuah bulih reta, bulih pengeraja ari taun ke udah, ngambika kami tau senang, tau lantang.”

Nyadi udah langkau panggau batu dibiau enggau manuk, tuai gawai lalu ngambi batu ai iya dulu, ke lalu dima tauka disandik iya enggau pua. Iya lalu ditangkan ka orang bukai niki kerumah niti tempuan. Nyadi semua pintu bilik sekayu rumah nya ditelengaka orang magang lak ka Petara tama nganjung tuah. Sida ke bejalai nya besundang tiga kali niti ruai enggau pantar ngenuluka bala lemambang ke mengap enggau orang ke begendang.

Sekumbang bejalai sida dilanggar sida serumah nya enggau tuak ke benama ngelanggar batu tiki. Udah tembu bejalai, nya baru sida lalu duduk ba ruai tuai gawai tauka ba bilik iya nitih ka atur dulu. Sereta duduk orang lalu ngasuh bini tuai gawai nyendiaka ai kena masu batu.

Nyadi utai endur masu baru nya, enti agi kelia ngena bisin temaga, tang kemayatu bisi bendar (ari tin tauka plastik). Utai direndam dia nya baka rangki, pelaga, gerunung, tinchin mas enggau ringgit. Nyadi utai kena ngirah ngambika manah bau nya buah kepayang kirai, kerupak buah langgir, tepus bau, bunga tual, bunga buot rangkai begulai enggau darah manuk enggau darah babi ke dibai pulai ari tanah kena ngenselan menua pagi nya.

Tiap iku orang ke empu batu lalu ngambi ai magang kena masu batu. Udah bekau nya, orang ke bisi pengaruh lalu, masu pengaruh sida ba ai ke diambi diri iya empu tadi. Udah nya baru tuai gawai ngayan ka upah orang ke masu batu. Utai ambika upah iya duku sebilah ka kering samengat, tepayan sigi ka kurung samengat enggau belachu sadepa ka tudung iya.

Kejang orang deka berengkah masu batu, gendang rayah lalu dipangkung tiga renggat. Sereta gendang bemunyi, siku orang lalu masu batu ngena ai ke diambi orang tadi enggau siku lalu ngeminyak iya. Udah batu diminyak, iya lalu ngengkahka batu nya atas dulang tapang, laban batu nya enda tau sabarang alai ngengkah iya.

Udah nya baru bala sida ke jadi tuai bilik tauka pengari nyendiaka sida deka ngatur pengawa begulu sekali agi ngagai ruai tuai gawai bebai utai dempa enggau utai irup. Sida pan lalu berengkah sama berami ngirup. Bisi sekeda nya mai tuak enggau arak, bisi mega bebaika ai kopi, ai teh, ni utai ke bisi. Bisi meh bebaika salai, kasam, lak ka semua bala pengabang enggau diri serumah sama bela ampit.

Udah begulu tu bala lemambang nampung pengap sida baru, mulaika semengat padi, semengat batu enggau semengat sida empu enggaika udah terunda-runda tepejuh jauh lebuh maya gawai.

Abis pengawa lemambang ke mengap, nya sida lalu digempuru ba ruai tuai gawai lalu diberi upah mega mata duit, belachu enggau kebuk sereta enggau besi baka duku ambika kering semengat.

Kadang-kadang, kena orang serumah nya berami baru, bala lemambang bisi mega diasuh orang nenjang bala orang ke minta denjang. Denjang tu reti iya pengap puji ngagai orang siku-siku. Udah tembu nenjang siku, lalu nenjang siku mega. Orang ke minta denjang nya sigi udah nyendiaka pemeri ngagai sapa lemambang ke asuh sida nenjang.

Niang Lemambang Salok Anak Jembu (1910 – 2002) ke tebilang manah nyawa sereta landik ngena leka jaku ba kandang menua batang Krian, Paku enggau Rimbas selalu mai pulai mayuh bengkah pemeri ari orang ke minta denjang. Entara utai ke kala diberi orang nya baka mata duit, tinchin mas, gelik mas, jam jari, tajung baru, pua kumbu sereta enggau utai bukai baka beras, kebuk enggau manuk sabung. Tang enti ba menua ke jauh agi, iya mina mai utai ke lempung agi laban kelia mina jalai kaki aja. Datai bejam-jam bejalai kaki enti ka menua Rimbas, Krian ulu tauka ngagai menua Paku.

Nyau pulai ngagai orang ti begawai nya baru, batu ke udah diminyak nya teju ka ba panggau dia dulu. Nyau pagi siti baru sida ke empu batu nya mai batu ngagai umai sida laban maya tu sigi udah manggul. Batu ke bai sida nya alai sida beransah kena ngepunka tebas sida, lalu jadika indu batu.

Kebuah pia, laban ukai semina siti batu pengansah aja ke bisi dibai ngagai pelasar endur sida ngetu tauka palan alai ngetu belelak lebuh nebas. Pelasar nya mega jadi palan alai sida ngintu diri makai tauka manduk asi enggau lauk, lebih agi maya beduruk bala mayuh.

Tang enti semina diri sebilik aja ke gawa, orang kelia selalu mai bekal ari rumah. Asi orang menya selalu ditungkus enggau upih, ke bisi nambahka penyamai asi, lebih agi enti nya asi ari beras padi bukit.

Gawai Batu tu lama udah nadai kala didirika ba menua kami laban udah lama masuk pengarap baru. Taja pan agi bisi dua tiga pintu bilik ke bumai bukit tauka bumai paya, bala enda tentu gagit agi deka ngintu gawai bakanya tegal orang ke bepenemu jalai intu iya pan nyau majak nadai. Ka tambah nya bala lemambang ke nemu pengap tu pan nyau nadai agi.

Endang ka baka iya, semua penemu ke bisi mina ambi ka simpan baka pesaka lama, tang enti iya dijual nyangka iya berega ari tajau Singa Raja.

Penemu nya ambi ka kena kitai maju nyingkang ngelangkah nuju pemansang dunya moden tu. Nya alai gayu meh penemu nya ku aku, enda iya bebulaka kita, besai meh pemanggai iya ka kitai, ulih iya ambi semua kitai ka penerang ati nuju pemansang enggau pemujur.

Gawai udah, gayu ku Antu gerai ku Sempandai

Ulih Apai Nana

Hari pemadu besai kitai bansa Iban dintu kena ngejangka taun ke udah lalu ngintu taun baru

Semua bansa di dunya sigi bisi pengarap enggau jalai basa nunggah, ngangau sereta ngintu bunsu pengidup ke dikumbai Petara lalu adat ke tumbuh ari nya tadi ngepunka pengawa rami ke diintu enggau mayuh macham jalai ke dikumbai begawai.

Baka nya mega kitai bansa Iban; pengarap kitai lain ari enggi bansa bukai. Kitai arapka petara ngintu, nemparu sereta ngemataka pengidup kitai di dunya tu. Nya ala orang tuai-tuai dulu kelia enda empera-empera begawai. Tak nyenggala amat utai ngasuh begawai nya baru begawai.

Munyi ke baru disebut tadi, pengidup kitai Iban beselatanka ‘burung’ sereta mimpi lalu ke bidik agi bisi meh nya nyeruga betemu enggau antu ke nyumpah berani, kaya sereta raja. Sema ke bisi utai nyemetak amat dia meh orang ngintu mimpi ngintu burung ngena Gawai ke sigi patut sereta enda alang-alang.

Begawai ukai pengawa mit laban orang ke dikangau sigi bala ari Panggau Libau ke lendat dibiau takang isang. Enti utai dintu alang-alang tauka mata pengawa, mayuh penusah tau nyadi. Enti baka ngetup kachang tauka chabi, nyamai kitai ngetatka iya, tang enti disumpah orang nya merinsa mensena lapar tabar, tusah ke nimuh iya. Engka tau ditung serak ke ngasai ke sumpah nya.

Kena ngepunka kenang aku pasal Gawai, aku mai kitai berati ke kenang Thomas Tegong Laka pagi 29 Mei tu tadi, pukul 7.30 pagi ke bekenangka pasal pekit Kumang Keling sereta Gawai mega.

Utai ke rindu amat aku ninga, lebuh iya ngenang pasal Gawai. Jalai kitai begawai, gaya sida ke tuai-tuai bisi tebelenga maya begawai kelebih agi ba pengawa miring, ke alai tudah tuai nyebut, “Pama maya Gawai tauka bisi pengerami ngintu temuai, mayuh amat bala kitai Iban narit temuai ke ukai Iban, Iban pan enti enda nemu adat miring enggai meh nyadi dasuh miring. Miring tu ukai pengawa mit.

Miring patut sigi orang ke nemu Miring. Kitai Iban patut nemu mida pengawa basa enggau penemu. Dua bengkah pekara tu enda tau disama lalu enda tau dikena nyeleti lapang enti sema nadai orang. Nya alai anang empega ngapa ngayanka piring enti enda chukup giga orang ke sigi nemu adat nya.

Mayuh amat kitai teperasa ngumbai orang dasuh miring kena meri basa ngagai iya. Piring ukai basa ngagai mensia tang ngagai petara. Tusun piring pan anang salah sangka. Ukai iya sebarang tabak. Atur engkah semua utai nya tadi mega bisi turan iya baka daun sirih enda tau dengkah tungkup enggai ke ati kitai enda ngerawang tauka ‘ati tungkup’ reti nya enda pandai kelebih agi semak bisi miring ke bala anak nurun sekula.

Dia penyilap besai kitai Iban ke agi megai pengarap lama. Ngemaruhka pengarap diri. Minta ampun ukai aku ‘racist’ tauka bebida bansa. Bala Laut bebasa amat ke pengarap sida iya. Maya rami sema jaku baka hari pengada, nadai sida iya ngasuh kitai ke ukai Islam tu macha ‘doa’ taja pan enti orang pengarap bukai nya nemu jaku Arab.

Cina mega enda ngasuh bansa bukai sembiang ke sida iya. Lalu orang Kristian mega mesti orang Kristian empu sembiang enti iya sembiang berekat. Enti sembiang besai mesti diuluka bala sida pada.

Engkitai pupu bansa enti datai, sida nya meh dasuh miring. Orang ke nadai nemu utai ulu ili, nya ke ngereja pengawa. Enti sema baka bebini, kitai ke empu pengawa, orang bukai ke diberi basa asuh ngintu. Bah! Sapa kitai deh? Tu ukai kenang nuju siku-siku, tang ngagai kitai Iban ke dikumbai siti bansa.

Iya ke patut Iban begawai, Iban meh miring - mesti Iban ke kul megai pengawa lama, ukai Iban Kristin, ukai Iban Islam.

Baka bebiau mega, udu amat kitai ngasuh orang ke tak enda entu landik. Ngasuh tudah tuai ngichaka pengawa tembu jampat tauka ‘ngiga jari’. Enda salah ngiga jari, tang di menua kitai sekayu Sarawak tu, mayuh amat kitai Iban tebilang bebiau. Bebiau ukai sengapa, laban semua leka biau bisi rintai menua enggau sapa bala petara ke patut disebut nitihka rintai ke patut.

Biau ke salah mega tau nganu semengat laban orang Panggau bisi ‘jaku’ tunggah dikena ngangauka nama sida iya siku. Orang tu mega orang ke sigi ditunggah enggau leka timang leka biau.

Enda ibuh jauh kitai mulaika pengingat, aku berani nyebut kira 20 taun ke udah, begawai sigi lain amat ari kediatu. Kelia pama begawai tu reti iya gawa meh nya tadi. Mayuh amat utai disediaka bala sida ke indu.

Sida ke lelaki lain ga pengawa lalu bala ke nembiak nyulu orang ketuai kena ngamatka leka biau “baka rutan tampung danan, baka wi tampung tali, carik kain batik ganti labung pelangi, parai orang ke tuai ganti tubuh kami”.

Semua gawa magang. Bala pengabang mega ukai semina ngabang. Tang orang ke datai tu tadi bela meri jari nitihka penau diri. Semua bisi kereja. Makai pan bisi maya makai, ukai semina nunga utai dempa ari mula niki sampai pulai baka kediatu.

Agi ingat amat aku jaku tudah niang mandar rumah lama kami suba, tanah aya iya tu tadi. Ku iya, “nyamai amat orang diatu begawai tau enda makai. Kami kelia mali enda makai”.

Maya nya, maya gawai ga. Aku enggau Apai Undi ngabang kili. Seninjik endar ga tudah tuai bisi duduk di ruai maya nya amat ga betanchang pala laban tudah enda dapat.

Dia aku beratika jaku iya nya tadi, tegenung aku ngingatka utai sebut iya. Amat endar. Laban iya ke tuai Gawai kami kelia, nyemetak amat pengawa bai iya. Begawai sigi begawai, makai pan bisi makai. Ukai iya ngumbai diatu enda makai ngetup leka asi. Utai ke ko iya nya tadi, begawai nadai utai dintu. Begawai kelalu balat ngirup nadai tuju, nadai kebuah.

Ba penemu orang tuai kelebih agi baka iya ke sigi tuai Gawai sereta manang besai, begawai enda tau sengapa. Patut bisi kebuah ke besai. Bisi mimpi, bisi kenyap, bisi laba dintu, bisi Gawai nama ke tuah, nya baru kebuah ke nyenggala amat alai kitai Iban begawai enggau naka pengekul sereta intu enggau pengawa ke chukup.

Enti agi suntuk, tau anang guai begawai laban pengawa alang-alang tau ngasuh semengat kitai rial laban enti dipantangka amat, antu nganu kitai ngintu pengawa memekang.

Agi mega ngintu pengawa besai pengarap kitai enda semesti iya dintu tekalanya. Pengawa nya mega ngiga pengelurus, bepanggai ga ba burung, ba kenyap.

Gawai kitai tu tadi pan udah ngelebus. Mayuh pengabang datai? Sapa miringka kita? Nyual pengarap nadai rega, tang enti sema Petara ‘bisi meli’ piring ari jari bansa bukai, kitai semina begawai tang orang bukai empu tuah.

Enda tau buya tauka ngelanggar penti pemali

Ulih Anya Kedap

Senti bini Agut ke empu semengat dikarung buntak rusa parai tegal anak iya bisi buya munuh buntak

Kira bisi tiga bulan udah ke beniat ba bukit tinggi, Senti bini Agut pan nyau betubuh bisi. Kasih meh Petara ka seduai melaki bini.

Lebuh kandung Senti nyau manggai ngagai sembilan bulan iya pan beranakka dua iku indu besapit. Iya ke beranak nya nadai penusah-nusah. Nadai utai pengaga-ngaga nya seduai melaki bini meda anak indu seduai sama manah gamal.

Angkat deh Agut tu enda mukai-mukai tak ngenyit sakit, lalu parai. Bangkai iya diintu sida tiga menyanak dua malam lalu udah nya diengkah ba lubang batang kayu, enda ditumbak. Kebuah enda ditumbak nya laban nadai sentubung endur engkah iya.

Nya alai sida tiga menyanak tu nyau tinggal kediri, nadai orang bukai enggau begulai, lalu nadai nemu tunga menua tauka mensia bukai.

Lebuh maya apai seduai nya parai, seduai menyadi endang sama udah angkat dara,lalu udah sama tau nulung indai seduai bumai.

Sapit ke tuai agi nya penama Liang lalu adi iya penama Angan. Liang seduai angan sama bajik sereta manah ulah, laban ke endang diajar apai indai seduai enggau naka ulih kenyau ari mit.

Agut ke parai nya ninggalka umai mekang-mekang taun. Nasit endar ga baru tembu nugal.

Udah bisi bebulan iya ke nadai, sida tiga menyanak pan belabuh mantun.

Nyadi Angan tu nyelaie endar utai diketenguk, iya nya tetenguk ka makai buntak. Ngumba endar ga mayuh amat buntak maya mantun. Lebuh ke mantun nya Angan tu nyau enda tentu masuk mantun laban semampai limpang begiga sereta betangkapka buntak.

Dulu ari tu, indai seduai Senti endang udah bisi meri jaku ajar ngagai seduai. Ku iya: “Enti seduai ngiga buntak, seduai tau nangkap sereta mai semua bansa buntak, semina seduai anang sekali-kali mai tauka munuk buntak rusa, laban buntak rusa nya karung semengat aku. Anang enda ingat seduai, kitai tu mega mali makai tauka munuh buntak rusa.”

“Au meh indai, enti enda tau dibai enda meh kami duai mai, enda meh kami duai munuh, ukai baka ke enda ngelala buntak rusa kami duai tu,” pia ku saut Liang. Angan pan nganggut pala iya ngayanka diri mereti sereta setuju.

“Kati berapa iku buntak rusa ke ngemai semengat nuan deh indai?” ku Angan nanya.

“Ee, tak semua buntak rusa nya mali dibunuh kitai. Orang bukai nadai pemali munuh, nadai pemali makai, tang kitai mali munuh, mali makai,” ku Senti nerang ngagai anak iya.

“Nemu meh kami duai indai,” ku Liang nyaut.

“Nya meh anak, enggai ka seduai kelanjur pagila lusa dudi hari ila,” ku Senti.

Enda bangat lama udah nya, angkat deh Angan tu tak ngenyit sakit kena tabin chelap angat. Nama lebuh iya chelap ngenjing getar-getar tubuh enggau kaki jari, tang nama iya angat enda ulih dikipas. Nama enda ditiup, iya ngigau lalu luput ngerang.

Dia meh nyawa iya pan enggai makai, iya pan nyau majak kurus sekurus. Ngirup pan nadai masuk utai mesai bulu mata. Mua pan puchat, lalu enda tentu bajik baka selama.

Iya tak mina gali aja, lalu kelalu lembut tulang enda ulih angkat ari peninduk. Macham-macham sera digiga tang anang ka nyawa bisi masuk sera, ensium bau utai dempa pan enggai. Makin lama, makin kurus.

Indai iya seduai Liang irau sereta tusah bendar ati meda Angan ke majak kurus sereta enggai makai lalu enda gerai-gerai.

Pagi siti Angan madah diri tetenguk ka buntak. Ninga munyi nya Liang seduai indai iya bebendar amat begigaka buntak kelauk tudah Angan ngichaka iya pulai gerai. Mina nyeliah diri ari buntak rusa, tang semua bansa buntak bukai ke tau dempa endang tangkap seduai magang.

Liang mujur bulih tujuh iku buntai ruai. Buntak nya tadi lalu dilulun iya ambika lauk Angan. Udah mansau nya baru iya meri adi iya makai. Laban ke belauk ka buntak, dia meh nyawa tudah tuai bisi masuk sera dua tiga suap.

Hari siti nurun ga Liang tu begiga ka buntak ka lauk adi iya. Sehari nya iya bulih semilan iku buntak alau. Laban ke belauk ka buntak alau nya tadi, Angan bisi masuk makai lima suap asi. Iya pan belinsur bisi kering agi, lalu nyawa pan nemu tetenguk deka makai. Meda bakanya, ati indai iya seduai Liang pan lantang meda Angan ti bisi berupai mansang gerai.

Nyadi hari siti laban sida ke agi besai mantun, indai seduai lalu nurun ga mantun. Liang tinggal di langkau ngibun adi iya ke apin tentu kungang, laban agi bedau tentu gerai sakit. Pemedis adi iya ke tabin nyau bisi kurang, lalu pen tau ga nuduk ka diri. Indai seduai pen baka selama nurun berari mantun, lalu tiap maya iya pulai genap tengah hari iya endang selalu mai buntak, laban utai bukai endang tak nadai masuk kena Angan ngelalu ka asi.

Angkat deh hari siti indai iya nadai mai buntak agi laban iya nadai tetemu ka buntak pagi nya. Tengah hari nya Angan lalu enda makai asi laban nadai lauk aruh ba ati iya.

Tegal nya, iya pan lalu ringat dalam ati din, tang iya enda memunyi. Udah nya baru iya bejaku. “Kati alai indai nadai mai buntak k’aku?” ku iya.

“Iya ga nadai nemu buntak, nyau abis buntak bukai ku iya, semuti buntak rusa aja ke bisi temu iya di umai din. Tang nuan nemu, kitai endang mali makai buntak nya,” pia ku saut aka iya Liang.

Nyadi maya nya, indai seduai endang udah nurun mantun.

Angan tu endang selalu madah ngagai aka iya, nama nadai buntak ke lauk, nyawa iya endang enda masuk makai asi. Iya endang selalu ngasuh aka iya nurun ngiga buntak.

“Enti nadai nemu buntak bukai, buntak rusa nya mih bai nuan lagi,” pia ku Angan madah ngagai aka iya.

Nya alai ninga munyi nya, lalu nurun meh tudah Liang tu tadi, lalu bejalai enda jauh ari langkau sida tiga menyanak, nadai ga nemu buntak bukai, semuti buntak rusa aja ke bisi dipeda. Nyau kepuas ke nadai tetemu ka buntak bukai, iya lalu mai buntak rusa siku. Mayuh ga buntak rusa dipeda iya tang siku nya manah endar peda iya agi, gamal ga gemu sereta sentar agi ari sida bukai. Tubuh iya gadung, mata chelum, janggut iya kuning-kuning gamal.

“Nadai ku enggau iya meh, ga nadai buntak bukai. Buntak rusa tu meh bai aku, taja ka ayam iya pan pama meh lagi,” pia ku iya bejaku dalam ati diri. Iya pan lalu mulai ka diri ke rumah. Datai di rumah, buntak rusa nya lalu disua iya ngagai adi iya.

“Aku nadai bulih buntak bukai, semina buntak rusa siku tu aja ulih aku. Tang nuan anang makai iya, semina kayam aja tau,” ku Liang bejaku enggau adi iya. Buntak nya lalu disambut adi iya enggau jari sereta lalu dipegai iya. Ati iya ringat laban perut berasai balat engkerau lapar lalu tulang pan lembut.

Udah nya tadi, Liang pan lalu nurun ga nyauk ai ambi kena iya nyendia diri berapi tengah hari. Tinggal Liang ke nurun nyauk, dia Angan, laban ke ringat, tak lalu pichit iya buntak nya tadi, lalu dikusuk iya. Bekau nya, bangkai buntak nya lalu dibuai iya kebaruh rumah lalu dipantuk manuk. Buntak nya pan udah ditelan manuk, Liang pan pulai ga nyauk.

“Adi, ni buntak nuan tadi enda lepas laban nuan?” ku iya nanya Angan.

“Eh, kapa aku nya. Kini ka enggau nya, dempa enda ga tau. Puas aku bayam iya tak lalu aku gelam ba pala iya, udah nya lalu mati,” ku Angan nyaut aka iya.

“Dini alai nuan engkah bangkai iya deh?” ku Liang.

“Iss, bangkai iya udah ku buai ke baruh rumah. Kada enda udah diempa manuk kini,” ku iya nyaut.

Ninga nya Liang lalu nilik kebaruh rumah. Perening iya ke kiba, perening iya ke kanan nadai ga meda buntak nya tadi. Dini iya bisi dipeda agi, iya ga udah diempa manuk.

“Nadai pendiau endar ga nuan munuh buntak nya, nya baru nuan dianu indai ila,” ku Liang.

“Nganu pan kapa enda nganu deh, ukai baka ke bisi guna, diempa enda ga tau,” ku Angan ngeransi.

Enda lama udah nya indai seduai pan datai ga pulai merarau. Udah indai seduai tembu mandi, sida pan lalu merarau. Apin lama udah nya, indai seduai pan lalu beradu deka mupuk nurun baru. Lebuh iya baru deka nurun dia deh pala iya tak lalu berasai ngelu, atau iya lalu engkual, indah-indah asai orang ke pedera.

“Oh nama main aku tu asai tu. Pala aku tu tak ngenyit ngelu,” ku Senti madah ngagai seduai anak iya. “Ti tak majak bakatu, ni enda mati aku tu.”

“Nama utai nganu nuan nya deh indai?” ku Liang.

“Enda nemu meh anak, tang aku tu tak lain asai. Kada enda seduai di rumah tu bisi salah pengawa? Nyangka seduai bisi ngereja utai enda asuh aku,” pia ku indai seduai.

“Ngg, tadi bisi aku bulih buntak rusa siku, tang buntak nya udah dikayam Angan,” ku Liang.

“Kati amat nuan bisi bayam nya?” ku indai seduai nanya Angan.

“Bisi aku bayam iya tadi indai,” ku iya. “Tang nyau kelama aku bayam, lalu aku gelam ba pala. Nama deh indai, lalu mati meh buntak nya. Bangkai iya lalu buai aku baruh rumah.”

Ninga munyi nya, lama bendar Senti enda bemunyi. Udah nya baru iya bejaku, lalu ku iya: “Aku endang udah madah ngagai seduai, kitai endang enda tau munuh buntak rusa. Nya alai laban buntak nya udah mati, mati meh ga aku. Buntak nya ga endang karung semengat aku.”

Seduai menyadi sama sedu enda bemunyi, sereta balat penusah dalam ati din. Bebendar amat seduai sama nyabak ninga jaku indai seduai.

Indai seduai lalu berengkah ngerendam beras taja pan pala tudah tuai nyau majak ngelu. Lebuh beras nya udah kembai, lalu ditutuk iya ka tepung. Nyadi tepung nya lalu digaga iya ka sagun enggau sungkui. Padi digirau iya nyadi letup.

Merinsa bendar meh iya ke ngaga semua nya, laban pala iya ngelu ka tambah perut ke makin engkual. Lalu digaga iya semua utai nya tadi, selemai-lemai nya. Semua utai nya tembu, hari pan nyau malam ga. Kira nyau tebuka tawas, iya lalu dani, lalu ngerak Liang. Iya tu ngerak Liang begadai-gadai laban enggai ka Angan ninga.

“Nama kebuah nuan ngerak aku deh indai? Kati agi pedis pala nuan?” ku Liang.

“Ngg anak,” ku iya, ” tak mansang ngelu meh pala aku tu. Nya alai aku tu mati. Laban aku deka nurun ke Sebayan, nya alai aku ngerak nuan, enggai k’aku kum seduai ninggalka seduai. Naka meh pengelembau aku tu mati. Tang kati ku enggau iya, ga karung semengat aku udah mati,” ku iya. Sereta abis jaku nya, Senti lalu nurun ninggalka langkau sida mansang ngagai Sebayan.

Tudah Liang lalu bediri ba pala tangga. Ari nya iya ngemata ka indai iya niti jalai mansang ke Sebayan. Udah nya ila tama baru ke dalam kibung lalu gali. Ati iya din asai ke disayat.

Lebuh hari udah tawas bendar baru Liang angkat lalu nanggar ka periuk. Sekumbang iya ke berapi nya tadi, dia iya endang seruran nyabak tang iya enggai inggar, semina ai mata iya ke ngenying jempuk mua. Sereta asi iya mansau, iya pan lalu mantai ka periuk nya.

Udah nya iya lalu deka ngadu ka seduai menyadi iya makai. Ati iya endang majak asai ke disayat, lalu balat tusah, tang iya ngelantangka gamal diri. Lebuh pemakai udah sedia, Liang lalu nyuaka asi ngagai adi iya. Nyadi pagi nya, Angan nyau udah dapat bendar angkat, nyau tau bejalai. Ati Liang enda ngadang adi iya udah ngenapat nya laban meda iya tiga hari dulu endang balat endar tabin.

Angan tu lalu tama ngagai bilik endur sida makai. Sereta datai dia, iya lalu malik ke kiba, malik ke kanan, tang nadai ga meda indai seduai. Bedau ga iya enda bemunyi, laban ku ati iya engka indai seduai apin pulai nyauk.

Udah nya baru iya malik ngagai aka iya. Tekenyit bendar iya meda siku nya tak ngenjing jempuk mua laban ai mata. Meda bakanya, Angan lalu nanya aka iya. “Aka nama utai disabakka nuan?”ku iya nanya aka iya Liang.

“Kati ku aku enda nyabak, indai tua ga udah parai,” ku Liang nyaut adi iya.

Ninga indai seduai udah parai Angan lalu enggau naka ulih ngasakka diri nyabak, lalu maringka diri sebelah bilik. Liang pan sama ngasakka diri nyabak mega. Bebendar amat meh seduai menyadi nyabak, naka pemalat datai ka seduai sama langkang ai mata. Nyau alah ai mata nadai agi.

Nyau lelak ke nyabak nya baru seduai ngetu. Lebuh ke ngetu nyabak, nya baru Angan nanya aka iya.

“O aka,” ku iya. “Ni indai? Enti iya mati, dini alai bangkai iya? Lalu nama kebuah alai iya tau mati?”

“Kati ku iya enda mati, iya ga karung semengat iya buntak rusa udah mati. Karung semengat iya meh buntak ke udah dibunuh nuan kemari. Laban karung iya nadai agi, nya alai semengat iya enda tau diau di dunya tu agi. Semengat iya enda tau enda pulai ke Sebayan.

“Pagi tadi tumu iya nurun nitih ka semengat iya empu ke udah nurun dulu ari iya ke Sebayan,” ku Liang madah ngagai adi iya Angan.

Nya baru Angan ingat ka penyalah pengawa diri ke udah munuh buntak rusa sehari dulu ari nya.

Nya alai ari ensera tu, kitai Iban kemaya haritu, endang agi ngemeranka pemali aki ini peturun diri, laban enti ngelaban penti pemali nya, kitai tau kena tinggang penusah.

Ngambika banding, bisi kami serumah mali nanam liya, endang kenyau ari kelia. Enti nanam liya, sida disumpah antu buta.

Angkat deh lebuh indai orang nya belaki baru udah ke lama balu tinggal laki iya parai, anak biak iya enggau laki ke parai nya tau tak buta tang ukai ada buta.

Diatu baru orang nemu, laki dudi iya suba lebuh baru datai ba bilik orang nya bisi ngema anak pengkuan dulu bini iya, maya iya nanam liya. Nya alai laban dima apai tiri iya nanam liya, tentu meh nya sama enggau nanam liya. Nya alai berengkah ari umur iya lapan ngagai sembilan taun iya lalu buta.

Siti mega utai tau dipelajar kitai ari ensera tu, kitai enda tau enda ninga ka ajar apai indai kitai, laban besai endar kebuah kita mesti ngasi ninga ajar apai indai sereta mega orang ke tuai.

Enda segulai sejalai beduduk ari rebut

Ulih Anya Kedap

Sida Keling, Apai Sabit Bekait beserara laban belaya enggai bebagi pesaka tuai kelia

Tu ngenang jerita kelia, maya menua apin bangat mayuh iga mensia nguan, maya kampung agi jerung, babas apin nyadi keranggas, dia deh bisi dua iku orang melaki bini diau ba rumah sebuah enda jauh bendar ba puak kampung puang din. Laki iya penama Agut, lalu bini iya penama Senti.

Nama menua endur seduai nya berumah nya, ku jaku tuai dikumbai orang Sungai Teritis Ai Manis baka beris Ujan Sehari, di Lempa Pasir Ngua Wuan Aka Batu Penguji.

Nyadi ku ensera sida niang ini aku Kejuang Meling menya, seduai melaki bini nya agi kelia menya endang sama serumah enggau sida Keling, sida Bunga Nuing, sama begulai enggau sida Ngelai sida Simpurai. Sida sama segempung enggau sida Tutung seduai Sanggul Labung, sama beapit-apit enggau sida Apai Sabit Bekait seduai Anchung Selung Bebelit. Sida sama semenua enggau sida Simpungga enggau sida Balu Gawa. Lebuh maya nya kelia menya, sida endang agi berimbai ruai, agi segulai sama sejalai, sama setangkai.

“Udah nya, nyau kelama sida udah begulai sejalai, dia deh sida bisi pengachau, bisi pengirau. Sida belaya enggau pangan diri ketegal berebut ka pengaruh pesaka tuai ke ulih aki ini sida kelia. Sida belaya enggau Apai Sabit Bekait berebutka pengaruh batu pengait mesai lilit labung kanggan. Nya alai Apai Sabit Bekait lalu pulai ke tisau langit bekuta rapit baka tambit pintu belulang,” ku ini nusui.

Bisi sekeda belaya enggau Keling Gerasi Nading Bujang Berani Kempang, Jelingau Kai Betugau Mayuh Rambang, Keling Aji Rangka Bini Seribu Tunang, Datu Au Pemadu Nama Orang. Sida belaya berebut ka pegaruh taring tengiling tau kai aning simpai lengan.

Nya alai mindah ga Keling lalu mai bala iya berumah ba Tinting Panggau Libau Gegiau Takang Isang, di Tuchung Engkeranji Padi Richah Rami Munyi Bala Pengabang, Puting Titi Baka Api Ke Nyadi Mau Ngerendang, Merawa Lama Munyi Ke Berimba Bung Nebang.

Bisi sekeda belaya enggau Duat Simpungga Digela Aka Bujang Simpuntang Medang berebutka pengaruh batu punggung kesa ubat lama besai enda jejena enda bula mesai tekaran. Udah nya Simpungga enggai diau dia agi, lalu pindah ngagai menua iya di Nanga Nyelenga Pun Takang.

Ba rumah nya dia ga alai Apai Separang Nyiung belaya enggau Tutung berebutka tanduk adung raja ikan. Nya alai Tutung lalu berumah di Gelung Batu Nakung Nyingit Nyinggung Sampang Benang.

Nyadi Tutung seduai Ngelai matak nembiak berumah di Gelung. Mayuh ga orang nitih seduai, nya alai rumah seduai pan panjai bendar ga. Enti nitih ka dalam ensera, rumah panjai enggi sida bulih sehari tajai terebai ngakak ngelayang; rumah pandak enggi sida puting sesetak nyilup remang.

Bakanya ga pemanjai rumah sida Keling di Panggau Libau kurang lebih manjai nya ga, lalu pia mega pemanjai rumah sida Apai Sabit Bekait, sida Anchung Selung Bebelit di Tisau Langit Bekuta Rapit Baka Tambit Pintu Belulang.

“Semua sida ke berumah panjai nya tadi endang bisi siku tuai ngempung rumah sida ngadu ka nembiak redak. Orang ke nyadi tuai nya endang dipilih semua orang ke rindu deka betuaika iya. Orang nya endang disadang ngembuan penemu, bisi pemintar sereta bisi pengering ati lalu bisi pengerajin,” ku niang ini aku menya ke lebuh ke nusui ensera tu.

“Sida tuai nya kena pilih, laban sida megai pengelurus lalu endang enda kurang pengasih ka mensia mayuh. Sida nya kena pilih tegal landik bejaku, lalu megai basa sereta mega lalu nemu semua batang adat enggau tusun jalai adat asal endang dikembuan sereta dikena bansa sida iya empu. Nya endang orang ke dipilih nyadi pengulu megai mensia ba menua sida dia.

“Nyadi beduduk ari ke bisi penyarut pasal pengaruh nya tadi, pendiau bala sida nyau jauh ngejang ari pangan. Mayuh bendar sida ke enda nemu alai pendiau pangan agi,” ku ini.

Kelebih agi bala sida ke nyau diau dalam kampung puang, endang nadai nemu riap orang agi. Mayuh bala sida ke diau ba kampung dalam nyau nadai betemu enggau pangan diri agi sampai ngagai dua tiga taun pengelama enda bepeda. Tang suah agi sida mina bisi tetemuka bekau pangan diri aja.

Nyadi utai ke selalu didinga sida dalam kampung nya mina nyawa jelu enggau burung aja, lebuh ke bejalai kin kitu. Nyawa ke semampai didinga baka nyawa Enggang, nyawa Kenyalang, nyawa Tajai, nyawa Ruai, nyawa Sengayan, nyawa Sempidan sereta nyawa burung bukai ke bekekahka buah kayu.

Kala ga ninga nyawa kera nyawa nyumbuh. Bisi ga hari ninga nyawa Remaung Ke Negung Mua Lubang, lalu enti malam bisi ka kala ninga nyawa Gerasi Tuk Tuie, nyawa Antu Ngasu Bebulu Bauh Dada, Antu Besai ke Bejalai Besangga Nyawa.

Nyadi maya nya menya, semua anak lelaki ke baru ngangkatka diri bujang endang semua sida ke benung bujang raya balat endar bepekit belaban ka pengelandik nyumpit. Sida besemekihka diri jelai agi kesuh laja ari enggi pangan diri.

Lalu ukai semina naka nya, sida mega bepekit ngaga ipuh ke bisa awakka iya balat jampat agi munuh ari enggi pangan.

Sida ke bepekit nya tadi nadai kala mai ati jai enggau pangan, tang endang tak bepekit nyabung pengelandik, nyabung penemu enggau penauu. Sida iya nadai nguji ngelaban pangan ngena akal ke enda rurus, laban nya ku sida ukai pengelandik.

Nyadi seduai melaki bini ba pun cherita tu tadi, iya nya Agut seduai Senti sama pechah ari rumah nya tadi lalu pindah ngentak rumah ba tengah-tengah emperan ba puak kampung puang din. Menua nya dikelingi madang buah mayuh macham, lalu sida nya endang enda kala ngelaung taun bebuah. Semua endur ke ngarungka rumah seduai nya mimit bendar ke udah rawak nyadi bali temuda, lalu rampa menua nya endang agi bedau kampung asal kenyau ari terubah-rubah dunya nyadi kelia.

Nyadi jelu enggau burung anang ditanya, ukai utai disebut nama agi bisi, tang endang agi mayuh sereta mudah diulihka. Nya alai menua nya endang selalu ditepat orang alai begiga ka jelu, alai berikan enggau nyumpit burung.

Jalai sida ngulih ka burung nya ngena panjuk betali penduk, bisi ga ulih sida nyempulut enggau nyelidik.

Nyadi jalai sida ngulih ka jelu nya ngena bubung, ngena pencharan, bisi mega disumpit sida ngena laja ipuh.

Bala sida ngulih ka ikan ngena kail betali tenggang, bisi ga nan bubu ba ai sungai ke besai sereta nan ensenga ba sungai ke mit agi, ke teman ensenga.

Semua pengawa sida maya nya nadai ulih rintai enggai silik, tang kitai mulaika diri nusui ensera nama penyadi seduai melaki bini nya tadi.

Nitih ensera, seduai melaki bini nyau kelama-lama ke begulai ngidupka diri ba menua baru bulih endar bumai betaun sereta amat lantang ba jalai pengidup.

Padi endang nadai kala enda bulih, laban tanah ke baru, lalu pia mega baka ikan, burung enggau jelu nyau leju makai, laban mudah endar bulih laban menua apin mayuh mensia nguan.

Nya alai dalam jalai pengidup seduai asai ka nadai pungkang nadai kurang, tang semina utai ke dikenadai seduai ngasuh kelalu seilu-ilu nya ketegal nadai anak nadai telesak.

Lemai siti Agut iya bejaku enggau bini iya Senti: “Nama runding tua? Kati runding nuan patut ka enda tua minta kasih ngagai Petara? Nyangka ukur iya kasih lalu ngasuh tua bisi anak, bisi telesak,” pia deh ku jaku Agut iya enggau bini iya.

Udah nya Senti lalu nyaut: “Ba runding aku, ngena meh tua munyi ku nuan nya, tang bakani ku jalai tua tau bejaku enggau Petara?”

“Pagila nuan ngaga piring. Lusa tua mai piring ngagai tuchung bukit. Din tua ila ngangauka Petara, nyangka ukur iya deka ninga ka kangau tua, lalu kasih ka tua.

“Mua meh pemerinsa tua tak nadai anak nadai telesak. Tang enti sema tua bisi anak bisi telesak jemah ila tua beselamat. Kena tua madahka pengaga ati diri lalu meri terima kasih ngagai Petara ke udah sinu ka tua,” pia ku Agut nganu bini iya.

Ninga nya, Senti pan sama selubang penemu enggau laki iya nya tadi. Hari siti, endang agi tumu endar pagi nya iya udah berengkah ngaga piring.

Lebuh piring udah sedia magang, seduai pan lalu nurun mai piring nya ngagai bukit.

Nyadi bukit ke deka alai seduai mai piring nya numbas penyauh ari rumah seduai.

Bukit nya endang pegari nama ba semua mensia mayuh ti mangkang menua nya, alai orang nampuk ngiga pengaruh, minta diri gerai ari penyakit ke lama udah nguan tubuh.

Bukit nya endang endur orang menua nya minta niat, beniatka utai ti ku ati diri empu.

Agi kelia, mayuh mega orang ke nampuk beniat ba bukit nya betemu enggau Petara nyerupa, lalu sekeda betemu enggau Petara dalam mimpi.

Bisi mega sekeda nadai mimpi tang nemu diri bisi bulih utai diniat dudi ari nya.

Nyadi bukit nya tinggi bendar, iya jauh agi tinggi ari bukit bukai ke bekelingi dia. Enti pagi hari tuchung iya endang nadai dipeda laban abis dibalut muahari, dibungkus remang enggau ambun.

Di tuchung bukit nya bisi telaga tiga iti berimbai-rimbai enggau pangan. Telaga nya nadai kala langkang.

Nyadi siti ke ari kanan nya jalai niki ngagai tuchung, nya telaga pemandi Kumang. Iya ke tengah nya telaga pemandi Simpandai. Iya ke ari ili nya telaga pemandi Raja Tuah.

Kumang datai ari menua iya di Gelung Batu Nakung, Nyingit Nyinggung Sampang Benang, ari ai sani aning ke nengkenching mali langkang mandi ngagai telaga iya nya sekali dalam sebulan lebuh maya bulan di langit benung peranama nyentuk.

Simpandai ke tau ngaga kitai mandi ga kia sekali dalam tiga bulan lebuh maya baru tumbuh anak bulan.

Raja Tuah mandi ngagai telaga iya sekali dalam setaun, iya nya lebuh bala anak mensia baru deka ngengkah ka diri bumai, lebuh maya bintang tiga enggau bintang banyak baru udah ayan ari tisau langit.

Nitih ka jerita dalam ensera sida niang ini menya, udah iya mandi, tubuh Raja Tuah lalu bebali perenching, lalu tubuh iya nya meh ke perenching mandang dunya.

Ari nya orang ke dalam dunya tau nyambut jereki enggau tuah ari iya.

Nyadi Simpandai lebuh iya mandi dia berunsut ngena batu kupak kulit kayu melaban.

Nya alai laban nya meh kebuah iya enda tau belinsur tuai.

Lalu bakanya meh tubuh iya jauh bendar bebali biak lebuh iya udah pulai mandi ba telaga iya nya.

Ku penemu orang, kayu melaban selalu beganti kulit, lalu bakanya ga mensia dalam dunya tu sebarang sapa ke bisi ngembuan batu kupak umbang melaban sigi mali belinsur tuai.

Amat meh umur sida iya tau tuai, tang tubuh enggau ati sida lubah bendar belinsur tuai.

Nyadi Kumang ti iya udah mandi ba telaga nya, tubuh iya lalu bebali manah, lalu dipuji orang enggau ati sampai ka jaku.

Nya alai pulai ka kena empa jaku sema: “Naka ga pemajik nuan ngenjing baka Kumang.”

Nya alai dalam leka jaku tuai, kebuah alai sida ke dara lubah belaki, lubah pegari laban bisi balut daki, balut miang munti, lalu lebuh sida udah pulai mandi bepuru miang, dia sida bebali bajik baru sampai ka apai indai sida enda ngelala sida agi.

Mulai ngagai Agut seduai bini iya Senti nya tadi, udah seduai datai di tuchung bukit, lalu ngengkahka ma seduai. Seduai lalu ngaga pelasar alai duduk.

Lebuh seduai nyau badu lelak, dia seduai lalu ngaga para alai ngengkah piring. Sereta para udah tembu, Agut lalu ngambi daun buan dikena seduai miring.

“Kati penyampau piring tua tu?” ku Senti nanya laki iya.

Ku Agut nyaut: “Kereja tua tu ukai kereja mit, kereja tua tu naka iya pemesai, nya alai enda tau enda dikereja enggau jimat sereta ngena jalai orang beniat.

“Pengawa beniat tu endang dikereja orang di serata dunya, tang jalai ngereja enda sebaka, nya alai tua ngena jalai ti patut ku tua, enggau naka ulih, ngena babi sepa, ngena piring, ngena ading lalu semua turun tujuh magang.”

Lebuh utai nya sedia magang seduai lalu nyampi nitih sampi orang beniat.

Leka sampi enggau penembu ensera tu deka ditampung dudi ila.

Ngiga sapa pengabis besai kuasa dalam dunya

Ulih Anya Kedap

Pejalai apai orang ke keran bendar ngiga ulu lungga entelah anak iya

Lebuh bala jelu terubah nemu diri balat tusah tegal anak mensia ke mula betebangka kayu, besungkurka bukit, bepunaska kampung jerung, sida lalu begelumu sereta b’asuh-asuh munuh sereta nagang Anak Mensia terus ngereja pengawa nya. Tang nyau keleju, sida lalu enda tetemuka bakani ku jalai munuh sereta nagang Anak Mensia.

Bup Danau Alai ke disalin ari bup jaku Inglis tulis Mervyn Skipper ulih niang aya (Tan Sri Datuk) Gerunsi Lembat seduai Pancras Eddy nya nyerita enggau penuh pasal aum bala jelu enggau semua utai idup dalam babas ke deka nagang anak mensia berimba menua, betebang kayu, begagaka jalai, rumah enggau mayuh utai bukai.

Laban ke lalu enda nemu ni chara ti patut sereta ngasi kena nagang Anak Mensia, nya alai semua bala jelu ke bisi penemu d’asuh mansutka magang. Tang mayuh ari sida nya mantaika penemu sida enggau jalai nusui cherita enggau ensera ke udah nyadi ngichaka nya ulih mai penemu baru ngagai bala ke enggau baum dia.

Nyadi siku ari bala ke nusui ensera nya Sawa. Ku Sawa, nyadi dulu kelia, bisi dua iku melaki bini. Laki iya nya penama Pa Kelau.

Seduai tu punas, sereta selalu minta anak lelaki ngagai Petara. Besari-sari meh seduai besampi Petara meri anak lelaki.

Nyadi hari siti seduai turun k’umai. Datai ba umai,seduai enda gawa laban tembu berundingka penyamai enti bisi anak lelaki, lalu bisi nyangkung seduai iya gawa, laban ke sama udah tuai lalu enda tentu kungang agi.

Benung seduai ke bejaku-jaku dia, seduai bisi meda Menaul manggum Tikus ngelayang ari atas seduai. Tikus nya tadi lalu dilengkaka Menaul nya tadi lalu labuh semak kaki Pa Kelau, lalu d’ambi iya.

“Peda nuan deh wai,” ku Pak Kelau nganu bini iya, “pemanah anak Tikus tu, iya ga lelaki. Anak tua lah tu diberi Petara ari langit nyin,” ku iya.

Lalu dibai seduai meh anak Tikus nya tadi pulai kerumah, lalu datai di rumah, lalu diberi seduai iya baju mirah sereta lalu d’intu seduai baka ngintu anak diri empu.

Tudah anak Tikus nya tadi ngasi bendar ka seduai, nemu nulung seduai iya gawa d’umai, pulai lemai nemu bendar ga nulung Pak Kelau ngema padi. Maka utai enda berani ngambi kediri enti nadai ari asuh seduai melaki bini nya.

Nyau kelama-lama anak Tikus nya tadi pen mansang besai ga, nyau bujang bendar. Gamal tudah ga chukup penyigat, mina bisi penyelaie mimit laban mulut tudah tuai ti munching.

Meda anak diri nyau bujang, Pak Kelau seduai bini iya pen nyau berunding deka ngiga ka iya bini ngambika beranak betelesak lalu bisi ngidupka seduai ke nyau udah tuai lebuh nya.

“Nya alai tu Igat,” ku Pak Kelau nanya anak iya, “baka nuan nyau bujang raya, numbas bendar umur alai ngatur diri. Nya ala kami duai indai nuan nyau betati deka ngiga ka nuan bini,” ku apai iya.

“Tak pemilih nuan indu kitai ditu,”pia ku Pak Kelau.

“Aku apai,” ku Tikus nya tadi, “ukai enggai bebini, tang enggai bebini ka indu kitai di menua tu. Laban indu kitai di menua tu beli magang lalu tegar bendar ngerising. Enti aku bebini, aku enggai enda jadi enggau utai ke pemadu bekuasa dalam dunya tu,” pia ku saut iya enggau apai iya.

Ninga nya lalu tusah ati meh Pa Kelau. Iya lalu madah tekala nya ngagai bini iya.

“Aku udah bejaku enggau anak tua,” ku Pak Kelau madah ngagai bini iya, ” tang iya tak mutus bendar ati enggai bebini indu kitai menua ditu, laban ku iya indu kitai menua ditu kelalu tegar ngerising, nyau selalu rangkai ngeli. Nya alai enti sema iya bebini iya enda tau enda jadi enggau utai ti pemadu bekuasa di dunya tu. Nama utai ti pemadu bekuasa dalam dunya tu deh, bisi kala ninga orang nyebut tauka ngenang nuan?” pia ku Pak Kelau nanya tudah bini iya.

Tak ngenjing nya nyaut bini Pak Kelau, mina demuh aja. Semalam sehari iay nadai bemunyi, berunding ka jaku anak seduai nya tadi, lalu bisi mega berasai tegepang mimit ninga anak seduai ke madah bala indu sida menua nya kelalu tegar ngerising. Udah nya baru iya bulig runding madah ngagai Pak Kelau.

“Dalam penemu aku, retuai,” ku iya, “nadai utai ke lebih agi bekuasa ari Matahari,” ku iya bejaku enggau laki iya.

“Enti munyi nya, nurun meh aku tu ngiga Matahari,” pia ku Pak Kelau, “tang bela makai dulu aku tu, nyau engkerau buah lemba tu,” ku iya nganu bini iya.

Badu makai, Pak Kelau lalu nurun ngiga tunga Matahari padam. Bejalai meh tudah tuai, niki bukit, melunggang tinting, ngilika ai, nguluka sungai, tanjung dipuntang ngenyadika diri lengkas agi tetemuka Matahari.

Nyau kelama-lama baru iya manggai ba munggu semak alai Matahari padam. Dia tudah tuai lalu changuk-changuk duduk nganti Matahari ke mansa. Lebuh iya meda Matahari nyau semak, sereta disadang iya ninga kangau, iya lalu nyapa.

“O Matahari!” ku iya, “anak aku diatu nyau bujang raya, chukup umur alai ngatur diri, tang iya enggai jadi enggau indu kami semenua laban indu kami din bagas ngerising ku iya. Nya alai anak aku deka jadi enggau utai ke pemadu bekuasa ba dunya tu. Kati ku nya deh Matahari, ukai nuan ke pemadu bekuasa ba dunya tu?” ku Pak Kelau, nyau enggau seput laban empa pengangat kena panchar Matahari ke kelalu semak.

“Ukai !” ku Matahari, “ukai aku ke pemadu bekuasa dalam dunya tu. Remang deh besai agi kuasa ari aku laban sida suah ngelindung aku, nya alai manah nuan kin ngiga Remang,” ku Matahari ngajar Pak Kelau.

Angkat ga Pak Kelau ari nya. Bukit diturun, bukit ditiki, nguluka sungai, ngilika ai, lalu niki munggu laban atas munggu nya bisi Remang.

“O Remang,” ku iya, ngangau Remang begada-gadai enggai ka Remang tegepang tekenyit lalu pambar. “Anak aku diatu nyau bujang bendar lalu chukup umur alai ngatur diri bebini, awak ka bisi bini mela makai, tang iya enggau jadi enggau indu kami menua din laban ku iya bala indu kami menua tegar bendar ngerising. Iya keras minta giga ka aku utai ke pemadu bekuasa di dunya tu. Kati ku deh Remang, ukai nuan utai ti pemadu bekuasa di dunya tu?” ku tudah Pak Kelau nyapa Remang.

“Ribut besai agi kuasa ari aku,” ku Remang, “laban kia iya ngasuh aku bejalai, kia ga tunga aku mindah,” ku Remang nyaut Pak Kelau.

Angkat ga Pak Kelau ari nya ngiga tunga Ribut. Nyau kelama iya ke bejalai, baru iya niki ngagai tuchung bukit sigi ke tinggi bendar, dia iya betemu enggau Ribut ke baru belabuh muput ka Remang.

“Amat meh Ribut tu bekuasa,” ku ati Pak Kelau din, meda Remang ngenjing pambar-pambar kena puput enggau sepu Ribut. Enda liat agi ati iya ngemataka dia, lalu dikangau ka iya Ribut.

“O Ribut!” ku iya, “anak aku diatu udah bujang bendar, kami duai indai iya deka ngatur iya bebini ngambika bisi enggau iya begulai. Tang iya enggai jadi enggau indu kami menua laban sida bagas ngerising. Iya keras deka jadi enggau utai ti pemadu bekuasa dalam dunya tu. Ukai nuan tu orang ke pemadu bekuasa ba dunya tu kini?” ku iya.

Ninga nya, lalu ngetu Ribut muputka Remang lalu nilik ngagai tunga Pak Kelau.

“Ukai aku ke pemadu bekuasa di dunya tu, aya,” ku Ribut nganu Pak Kelau, “Bukit lebih agi kuasa ari aku, laban puas bendar aku bepuput ngelaungka iya,” ku Ribut. Ninga munyi nya, lalu mutar ngagai Bukit ga tudah Pak Kelau.

“Enti munyi nya, nuah meh Bukit jadi enggau anak aku,” ku iya. Lama Bukit demeram ninga jaku nya. Ukai enggai jadi enggau anak nuan ga aku aya,” ku Bukit, “tang kuasa aku enda berapa besai, laban bisi utai ke mit bendar berumah dalam tubuh aku, nya baru utai ke pemadu besai kuasa dalam dunya tu.

“Utai nya selalu nebuk aku, diatu nyau deka kebus tubuh aku tu ditebuk iya,” pia ku Bukit nganu Pak Kelau. “Seharitu balat pemedis kaki aku tu udah ditebuk sereta dikerituk iya, dini enda para aku tu ila deh,” ku Bukit serabana ka pemedis diri.

Udah Pak Kelau mending cherita Bukit nya, lalu nurun meh tudah tuai ngagai kaki Bukit, lalu ngiga utai ke pemadu bekuasa di dunya tu. Datai itya ba kaki Bukit, lalu tilik iya kia, jenguk kia-kia, nadai ga meda utai nyelai.

Nyau kelama baru iya tepedaka utai kerus-kerus ngeraus tanah ngaga lubang. Tilik iya semak agi, peda iya Tikus.

“O,” ku ati Pak Kelau din “tu deh utai ke pemadu bekuasa ku Bukit tadi.”

Tak lalu ditangkap iya Tikus nya tadi, lalu terus bai iya pulai kerumah sida. Datai din lalu disua iya ngagai anak bujang iya.

Sereta meda anak dara Tikus nya anak bujang iya lalu manjung naka penginggar-nginggar empa pengaga ati, laban apai iya Pak Kelau udah ngenataika peminta iya.

“Tu baru indu ka bini aku,” ku iya, “lama bendar aku udah nganti lalu irau ati takut ka nuan enda bulih,” ku iya nganu apai iya.

Lepas nya lalu begulai meh seduai nya tadi, sereta lalu ngaga sarang seduai empu ba kaki Bukit.

Nya alai tak kini-kati pan Tikus deka mali nyadi mensia, enda meh ulih, laban dia tadi kitai udah ninga, ku Sawa sereta lalu nguap.

Nyawa iya ke ensera nya tadi nyau tendu setendu, lalu bisi engkuam mimit ba ujung ensera laban iya empu ngantuk, ukai bala orang ke ninga ngantuk.

Ba pengujung ensera pala Sawa pan nyau luga-luga balat agi ngantuk. Ensera iya abis, tudah tuai pan tinduk ga.

Kebuah ke balat ngantuk nya, laban iya ke agi kenyang sereta berat udah bekau nelan uduk Anak Mensia ke bisi ngeluga iya nyalak sebedau iya d’asuh sida nusui ensera tadi.

Pengap kena ngambi Simpulang Gana ngabang

Ulih anya kedap

Lemambang dulu nyebut nama tuai Iban, Laut, antu, Kumang seduai Lulung nanya pemayuh pengabang

Lemambang mengap gawai batu terubah nyebut genteran ngerintai tuai iban, udah nya nyebut tuai laut enggau tuai antu.

Lebuh bala tuai udah datai magang, dia deh leka pengap bala lemambang ke mengap lalu nyebut nyebut semua indu antu.

Sida lalu nyebut kumang seduai lulung ke ngasuh simpurai seduai pungga madah ka pemayuh rampa bala pengabang.

Seduai nya lalu nyau bejalai setak ka setak. Lebuh seduai iay baru datai dia baru, dia seduai madah pengabang amat mayuh, tang agi bisi lapang, amat mayuh tang agi bisi kurang. Seduai nya madah diri nadai meda raja simpulang gana datai enggau orang ngabang.

Ninga berita ditusui pungga seduai simpurai munyi nya, dia kumang seduai lulung ngasuh seduai iya ngambi raja simpulang gana ngabang. Tang seduai madah sama enda tau ngambi ngabang.

Dia kumang lalu ngasuh bujang geranjang, tang bakanya mega bujang geranjang madah diri enda dapat ngambi ngabang.

Udah nya baru simpurai seduai pungga ngasuh bujang nendak. Bujang nendak madah diri deka, tang iya enda tau enda nanya indai iya dulu. Indai bujang nendak lalu ngasuh iya nurun ngambi ngabang.

Nya alai leka pengap ba genteran ngambi ngabang nya munyi tu:

Tuju lagu rumah sebuah gagai tuai rumah sebengkah lalu gagai orang di kedap malupa meletup munyi ka masak chagak bedil mariam

Kedua bali nama iya, batu tekup bedaup munyi nyawa bandam betan nya menua nendak nendai berambai biring.

“Aku nginjau nuan nyapa bujang simpulang gana, berumah di nanga temaga gelang.

Nginjau nuan nyapai rangkang kirai berumah di sungai penyangkai dagang.”

“Au! Nganti aku nanya indai aku bebendai besai tujuh keliling, bebendai besai inggar beranaing.”

Indai bujang nendak pan lalu nyaut iya munyi tu:

“Terubah aku nyera ka nuan lantang anak sendia; punggung nyerendung enggi aku bejung lampung wi rutan.

Nya alai aku bepenti mali makai lelabi ulih ngali ari tisi ungkap dalam.

Laban kitai endang tiri pantis ari kelia menya selama jeman ke tau nyapa raja simpulang gana.

Laban nuan ke endang tau nipan lubang ujan teman geran belematan puang.”

Udah bujang nendak tembu bepasuk ngepan, iya lalu nyau bejalai ngambi ngabang. Dia iya lalu ngetu ba menua ini manang matai nanya ka jalai:

“Kami tu deka nanya ka jalai ngagai tuchung tangkung seribu. Deka nanya ka jalai orang ngagai tinting kaling alu. Kami tu ga enda nemu jalai penemuai; Enda nemu pelimpat jalai penyangkai.”

Dia ini manang lalu nyaut:

“nama penyauh menua deh uchu, din ila pinang chechinang pegari mansau, enti ditu deka nginsap, din ila kekelap api semakau.

Jalai besai meh nya uchu tampung tempuan. Jalai raya meh nya uchu, badas baka, tampung jamban.

Angkat bujang nendak seduai burung malam ari rumah ini manang matai, seduai iya lalu ngagai rumah raja ribut. Seduai lalu pinta tampung raja ribut ngambi raja simpulang gana ngabang. Bakatu ku leka pengap ba genteran nya:

Nampai menua orang di kerimpak batu burak, ke tampak betau-betau nampai menua orang di serunggu langkau batu, baka balun langkau kayau.

Nya menua antu bua ke gana-gana mangka tegalan, nya menua antu besin ke bemain niti papan.

Tujah tangga lalu ditiki jengkau lalau ginchi sekali meda ruai jebung enggi bua angin nyabung, meruan gantung upung gagang pinang.

Nampai ruai besai enggau bua biau balai, agi anchau tikai baka ke baru pulai puang pengabang.

Lalu pansut endu dara ramunai berambut panjai nipas uras, pansut kumang seladang taya kapas, lalu nyapa antu bua ke gana-gana mangka tegalan, lalu nanya antu besin ke bemain niti papan.

“Bisi pejalai meh kami duai tu aki, minta silih nuan nunda sempadi api pengerang, minta tampung nuan nunda semeliung putus pungkang,” pia ku bujang nendak.

“Enti kita nginjau aku nyeru raja datu, nya endang alai aku mansai nubu ngerebung mang.

“Enti ngagai menua rangkang kirai, nya endang alai aku teleba ngerambai lemiding danjang,” pia ku saut antu ribut.

Antu ribut lalu angkat mansang ngambi raja simpulang gana ngabang ngagai gawai anak mensia di baruh senawah bulan mandang:

Nya baru ngelegua angin reraga baka baya pansut ari lubuk. Lalu sedendang angin kenchang baka lang nyambar manuk.

Dia ribut ke pepuput bambi-ambi, bua ke bepangka muai kudi.

Rari antu buntak ari lebak ngeruang dulang, rari antu chit taku jempit tinggang batang.

Lalu mangka ka tinting baka kinking pemalu tapang. Mangka ka rau nyegu baka tunu api pengerang.

Pusai ulun tuai simpulang gana ke nyaga engkenyang iya di umai lalu ninga utai nyelai bendar munyi. Iya lalu bisi ati rari.

Bakatu ku munyi pengap ba genteran pusai ke rari:

Ruya ruya bunga raba, nyaduh betubuh pusai lansik ninga.

Ninga utai tak begu-gu munyi nama, nama utai tak begu-gu munyi apa.

Lebuh iya mensiang mengkenyang uap, rapas peda mata nentang.

Lebuh iya mensiang mengkenyang api, tengah hari nyentuk ka petang, dia pusai beati kesal di jungkai lua ati. Dia pasai beati takut lalu enda berani. Gembi-gembi rarak entali, nyaduh betubuh pusai ati rari.

Japai iya selabit, tinggal ga ladung. Japai iya duku, tinggal ga sarung.

Lalu belanda meh pusai rari, dia iya tepapa ka tuga baku betudung, tesangkut ka rumput bejanggut kumung.

Pusai ke rari nya tadi tak enda tetiki ka rumah diri empu, dia iya lalu tetiki ka rumah bini simpulang gana, bakatu ku munyi leka pengap senentang genteran nya:

Tak tetiki ka rumah endu endun serentun tanah tumbuh, tetiki ka rumah endu iyak cherindak tanggi buluh.

Datai pasai dia, ngakai-rai kelah-kelah datai pasai dia beguai sengah-sengah. Ditanya orang enda nyaut seleka mukut, enda nimbas seleka beras. Lalu gali melekang pukang, gunjuh-gunjuh gali telentang.

Udah nya ribut ke bepuput pan lalu datai mangka ka rumah bini simpulang gana. Terubah iya mangka ka rian, udah nya lalu mangka ka pinang, ka telenga atap, udah nya mangka ka langgur tenun. Dia deh bini simpulang gana lalu berasai chelap bulu. Irau ati ka diri asai nya, dia iya lalu beati nilik. Tu munyi leka pengap ba senentang nya:

Kechik-kechik anak lelayang tasik nyaduh betubuh bini simpulang gana belabuh nilik. Lalu nilik ari benda pending lambing pending sajengkal tarik.

Lalu tepeda ka pengawa bala sida Anak Dayak enda jejena nguan menua. Lalu tepeda ka endu dara riduh bangat kiruh ngintu kereja.

Udah nya bini simpulang gana lalu ngangau ka laki iya mai nurun ngabang. T

ang deh anak dara iya penama endu dara chanda enggai enggau ngabang laban menyadi iya lelaki penama sigai nadai dia.

Ninga nya, sida lalu belatur nutung.

Sida ngangau ka sigai ke diau di tasik besai ledung linang. Terubah sida ngiga utai ka rumbang tutung, udah nya lalu ngiga kulit iya. Udah tembu tutung nya digaga, sida lalu belabuh nutung. Nyadi leka pengap ba genteran nya bakatu:

Udah nya lalu angkat orang tuai mai tanduk rusa ke beperiga mengkang kerubung, jari puting iya minching taring uting babi bindung. Lalu dipangka ka iya ba pala rumbang ketebung.

Dinga tak didedat ka iya di selingap rumbang tutung. Dinga tutung tak taung-taung nyadung berita. Dinga tutung tak tetaung nyelinting nama.

Udah nya sigai seduai bini iya lalu ninga. Dia deh sigai lalu mantai terupung iya sereta lalu nerupung laban deka meda kebuah sida apai iya nutung ngangau iya.

Sigai ke nerupung tadi lalu tepeda ka pengawa anak dayak enda jejena ngereja pengawa mua pemesai-mesai.

Dia sida lalu belatur nurun ngabang. Semua madah ka enggau ngabang magang bala sida benda, sida kebuk, sida guchi, sida udat, sida tempayan, benda pelawan enggau bansa tajau bukai.

Semua ka enggau magang. Nyadi cherita ti diketu ditu lalu deka ditampung baru dudi ila.

Teperindang ati ninga genteran timang jalung


Ulih Anya Kedap


Tuntung lemambang kena nanya ensumbar semampai dianti enti maya malam Gawai Antu

Ba bansa kitai Iban pengerami Gawai Antu nya atur ti pemadu besai lalu kena merantu orang ke udah parai ninggalka dunya injau kitai tu. Taja pia, ukai semua menua ngena jalai ti sama nirika gawai tu.

Kebuah pia, laban mayuh menua mina niri gawai nya nempegal sepintu bilik aja. Tang di menua batang Krian enggau Saribas Gawai Antu tu dintu orang serumah nya lalu bisi mega sebuah rumah panjai nya ngintu gawai nya takah ngagai 30 taun baru ngintu sekali.

Utai ke amat ngerinduka ati ba siti-siti Gawai Antu nadai lebih ari enggau tauka semina meda orang ke Ngalu Petara.

Tu meh maya bala indu dara pansut ngena ngepan indu kitai Iban, lebuh sida ke bejalai niti rumah sama enggau bala bukai sereta mega bala raban lemambang ke nimang jalung. Nyau richah munyi dauh burung pilin munyi duit tating kain sida bepangka.

Lalu udah tembu ngalu petara lemambang lalu belabuh nimang baru nyentuk ka sida nembuka timang enggau tuntung jalung.

Nyadi sida nuntungka jalung nya kira belabuh ari pukul tiga dini hari. Nyadi tu utai siti ke ngerindu bendar ati, laban nya maya orang nuntung bujang berani.

Kebuah pia, semina orang ke udah bedengah enggau orang ke aris aja tau ngirup jalung.

Tu meh maya lemambang lalu nanya ensumbar bala sida ke makai jalung nya. Ensumbar tauka gela tu mai mayuh reti ke belalai, tauka cherita lalai.

“Tebal agi sida ke bisi ensumbar nya endang orang ke udah bulih dengah munuh munsuh, taja pan bisi sekeda nya bulih dengah ba kaki tangga.

“Reti tu, sida ukai bedengahka munsuh tang udah ampit basah jari. Bisi nya udah munuh orang lebuh ke belaya, bisi mega nya udah munuh orang ari kebuah bukai,” ku Lagat @ Anyau ke sigi orang ngirup jalung empu ari Kedap, Saratok lebuh berandau enggau penulis apin lama. Lagat ngirup jalung ngena gela Baya Mangah Teluk Lubuk, Rara Rangka Manggum Buok.

Amat meh Gawai Antu tu jarang agi didiri diatu, tang setiap kali bisi gawai nya didiri orang ke ngirup jalung nya sigi agi beguna. Nya kebuah ba menua batang Krian enggau Saribas sigi agi bisi orang ke ulih ngirup jalung enggau buluh kena nembu ka Gawai Antu.

Nyadi lebuh Gawai Antu ba rumah panjai Sungai Klampai, di Saratok kurang lebih dalam taun 1970 menya, endang sigi agi mayuh sida ke diambi ngirup jalung nya orang ke udah bedengah.

Nyadi lebuh nya siti raban ke nimang jalung nya bala sida aya aku Dundang anak Enchana.

Iya matak jalai nyadi ketuai bala lemambang ari Malupa. Nyadi lebuh nya rindu amat ninga sida ke nimang, kelebih agi lebuh sida ke nuntung ka jalung ngagai bala pungka laki ke ngirup jalung.

Orang keterubah ngirup jalung kena tuntung lemambang Dundang iya nya niang Tindin tauka Apai Gawing, sida ari Mendas. Tuntung nya munyi tu:

“Lama kitai ke besaruk duduk bebanding. Ku lama udah ninga gela nuan unggal dedarah sawa indu tedung, ba arung jalai pemuntang.

“Oh sapa perinyai ambai sulu sangkung lebuh jawang agi gegayang gamal gegandung, alai tangan tunjuk ujung nuan tau dinjau orang nyuluk ka upung nyiur nyintung tak lepung-lepung mesai tempulung lang tansang, oh ku aku tansang lang.”

Udah nya tadi Tindin lalu nempap tikai madah ka ensumbar diri ‘Pipit Manchal Menua Ili, Gelumbang Mechah Ari Jai’.

Nyadi niang Tindin menya siku orang ke bagak sereta jegak lalu suah udah dambi ngirup jalung ba batang Krian enggau Saribas.

Udah nya lemambang Dundang lalu nuntung ka jalung ngagai siku agi pungka laki ke ngirup jalung ba ruai orang nya, iya nya Taboh anak Tilang sida ari Batu 4 Jalai Lama Roban/Saratok enda jauh ari rumah orang ke begawai nya. Nyadi tuntung Dundang a.k.a Apai Aling munyi tu:

“Oh…lama lemai kitai ke besaruk duduk berintai, lama udah aku ninga gela nuan ke bedarah sama tedung tendai, entang ke tu lebuh kitai kebejaku kelulu nyampau dirintai, kali jenti nuan udah bebini, tang lebihka gayang gamal lelempai, sapa ambai tulang peransang…iya ku aku peransang tulang..oooh”

Dia Taboh pan lalu madah ka ensumbar diri ‘Pemalu Batang Buan, Pengirit Menua Batu Enam’.

Udah tuntung ngagai Taboh dia Dundang pan lalu nuntung unggal Anthony Lawai, ke lebuh nya agi mengkang nyadi pengajar be sekula primary. Pengajar Lawai tu orang ke jegak sereta pemanas tang siru sereta nadai mentas begulai enggau orang.

Nyadi lebuh ke dituntung ulih lemambang Dundang ba gawai nya, tuntung nya munyi tu:

“Jadi aku deka nanya ka ensumbar sida bujang mereti aya tedi ke berani ati tunggang changka. Tadi aku nanya ka ensumbar sida unggal ke digelar dua dama.

“Nya alai tu laban pengawa ke bakarera mayuh dikereja, ditangkap rikot opis radio.

“Nya alai tu aku meda unggal aku Lawai jadi master, bisi ditu begulu duduk besemuka.

“Aku nanya ensumbar iya, kebuah randa tau nembuka pengawa ngadu kereja, nanya ka gelar ensumbar nama dedinga raja ti sabara orang ngeluie…iya, oooh ngeluie orang.”

Saut Anthony Lawai madah ka iya bisi dua iti ensumbar. Reti nya iya udah bulih dua dengah.

Ensumbar iya ke terubah nya ‘Unsut Insai Baruh Batu’ lalu iya ti kedua nya ‘Lalang Layu Ulu Sarikei’. Diatu Anthony Lawai udah pinchin nyadi pengajar lalu agi regas bendar enggau orang kulu-kili.

Udah iya nuntung Lawai, dia Apai Aling lalu nuntung niang Nyawin anak Merdan tauka Apai Enduh bala kami ari Kedap dalam Malupa. Nyawin tu menya udah ampit enggau orang nyadi polis ba pasar Bau.

Iya tu landik ngajat, kering sereta nelap. Nyadi tuntung Apai Aling ngagai iya lebuh gawai nya munyi tu:

“Lama ga udah betunga duduk betiban, selemai ke rangkai jauh malam. Nya alai nuan ke dipeda aku tak beria-ria di puncha panau lengan, tak mua tampak baka senayak pajar bulan.

“Nuan endang dipadu ka sida ditu Batang Sebetan nembu pengawa sida ke udah lela matai danjan.

“Nya alai nuan digela aku sama, digela aka melimban. Nya alai sapa dama ambai nuan bujang besai ke lelempai tubuh memelan.

“Aku meda jari kiba nuan endang bisi becherengga pansa darah Iban.

“Nya alai aku tu endang nemu nuan amat berani ati tunggang tajam, tang aku enda nemu gela ensumbar nuan.

“Tang enti enda berani ati tunggang tajam, bula orang ke madah nuan nyuluk tandan nyiur bulan, tak melan-melan sadau, gagang deh labuh iya…oooh, ku aku labuh gagang…oooh.”

Ninga munyi nya, nyau meletup tempap tikai niang Nyawin menya. Udah nya iya lalu madah ka ensumbar diri ‘Lambur Mandang Punggang Menua, Api Nyadi Pasar Buso’.

Udah iya nuntung ka jalung ngagai Nyawin, lemambang lalu nuntung ngagai siku agi bujang berani iya nya niang aki kami Jerampang anak Saat ari Assam, Malupa. Nyadi timang tuntung Apai Aling munyi tu:

“Lama kitai ke bepangkang bedenjang duduk bebandung, nya alai aku meda tak tinggi di suli imbai serangkung dipeda aku baka chemaru jelu remaung, landik negung sengkelung batu besundang.

“Tang ke tu, aku nemu nuan tau makai ai ginjai sida ke parai sulai pumpung, aku ninga nuan tau ngirup rakup buluh betung, nya endang bagi sida ke bebadi sulai lindung.

“Nya alai ti udah munyi tu nama gela alai nuan tau kereja nya, kedua agi ngirup ai garung, siti ke beranggung tunjang mayuh iya..oooh mayuh betunjang… ooohh.”

Niang Jerampang lalu tekala nya nyaut madah ka ensumbar diri ‘Pintu Batu Nanga Igan, Indu Balu Ditemu Jauh Malam’.

Jerampang tauka Apai Naya menya endang orang ke chukup penegap, tinggi, bagak sereta mega regas.

Iya ukai semina ngirup jalung tang mega udah suah enggau orang ngirup buluh, iya nya segigi tinggi ari sida ke ngirup jalung.

Ka penudi iya Dundang lalu nuntung ka jalung ngagai Bandang anak Kasa, sida ari Kelua ba Batang Krian. Nyadi timang iya ngagai niang Bandang munyi tu:

“Lama aku udah tetampai ka apai nuan jejanguk duduk di ruai, ke lasah anchau tikai, nya alai nuan udah ke injau sida rantau Sungai Kelampai, ke nembu ka pengawa sida ke udah lela matai nadai, ngirup buluh simbang landai, nya alai nuan tu digela aku tuai tau nembu ka gawai, sapa jenti bini agi lelanji tubuh lelempai agi ba tembai aku nanya ka ambai tulang diransang iya..ooooh .. peransang tulang..oooh.”

Nya ku munyi timang tuntung Apai Aling ngagai niang Bandang menya lebuh Gawai Antu ba Sungai Kelampai. Nyadi Bandang madah ka gela diri ‘Labu Rendam Puak Kerapa’.

Munyi ku jalai tuntung timang lemambang nya tadi, orang ke udah bedengah nya enda chechamang madah ka ensumbar diri. Sida ke madah diri ngirup jalung nya ukai tegal bisi dengah, tuntung timang lemambang bisi lain mimit.

Nyadi enti orang ke ngirup jalung nya bebula madah diri udah bedengah, lemambang ke changka baka niang apai aku Salok Jembu tau ngena ‘tuntung sumpah’ ke tau ngujungka pemati iya ketegal iya udah bula.

Nyadi sepengelama niang apai enggau orang nimang jalung, iya udah ngena tuntung sumpah dua kali. Seduai nya sama nyau mati dua-tiga bulan udah bekau ke ngirup jalung ba gawai nya.

Nyadi mayuh mega orang ke ngirup jalung enggau ngirup buluh, pia mega sida udah bensumbar ke udah mati enggau ke agi idup ke dikelala tauka ditemu aku.

Ba bilik kami niang apai tuai aku Ngauh anak Narang (menyadi tuai indai aku) mega enggau orang ngirup jalung. Iya bulih dua iku dengah lebuh pegi ngagai menua orang kelia.

Apai tuai Ngauh ke mati dalam taun 1973 menya bensumbar ‘Layang Mandi Pukul Lapan’.

Nyadi aya aku niang Ujih anak Untan menya bisi bedengah mudah lalu udah suah makai jalung. Ensumbar iya ‘Anak Kumang Mati Lus’.

Orang ke dangkatka aku Tawi Bungin bensumbar ‘Lanang Kasih Sayang Bedindang Madang Rutan, Tawi Berani Ati Pemudi Kayan. Petunggal iya Naing @ Aki Kawit bensumbar ‘Berinau Panggau Dara, Naing Pengerambing Kaki Kuta’.

Siku agi petunggal seduai Subong Bran @ Aki Musa bensumbar ‘Kala Nyepit Naka Pemisa-misa, Bunga Parapenit ka Dujung Indu Dara.

Jadi enti bisi awak, nembiak rebak baru anang enda bebendar ngenyemak diri ari tugung lemambang ke nuntung jalung lalu ninga ka sida nanya gela sida aya ke udah buya datai jari, bala sida bujang ngerigang changka berani.

Bala sida ke mang ari kepayang rendam sepagi, juring ari puting peraja besi, tajam ari tandan mata geraji.